مرکزی قیادت

مملکتِ خداداد پاکستان اولیاء اللہ اور علمائے کرام کے فیضان کا کرشمہ ہے، جس کے قیام کا سہرا حکیم الامت و مصورِ پاکستان علامہ ڈاکٹر محمد اقبال، بانیٔ پاکستان قائدِ اعظم محمد علی جناحؒ اور ان کے عظیم رفقاء اور جانثار ساتھیوں کی طویل جدوجہد اور بے پناہ قربانیوں کے باعث ممکن ہوا۔

تحریکِ پاکستان میں جہاں برصغیر کے مسلمانوں نے متحد ہوکر حضرت قائدِ اعظمؒ کی ولولہ انگیز قیادت میں جدوجہد کی، وہاں مشائخِ عظام اور علمائے کرام کی کوششوں کو بھی فراموش نہیں کیا جاسکتا۔

قیامِ پاکستان سے لے کر استحکام و دفاعِ پاکستان تک، مشائخِ عظام، علمائے کرام، تمام مذاہب و مسالک اور پوری قوم نے ہر مشکل گھڑی میں سیسہ پلائی ہوئی دیوار بن کر وطنِ عزیز کی ترقی، سلامتی اور بقا کی خاطر قربانیاں دیں۔

متحدہ علماء مشائخ کونسل آف پاکستان گزشتہ تیس برسوں سے اسی عقیدے اور نظریے کی ترجمانی کرتے ہوئے میدانِ عمل میں ہے، اور اسی نصب العین کو اپنی منزل سمجھتی ہے، جس کے لیے کونسل کے بانی چیئرمین ملک صفدر علی اعوان اور ان کے اولوالعزم ساتھیوں نے بڑی جرأت و بہادری کے ساتھ علم بلند رکھا ہے۔

متحدہ علماء مشائخ کونسل آف پاکستان مورخہ 22 اکتوبر 2014ء کو الیکشن کمیشن آف پاکستان میں بطور سیاسی و دینی جماعت رجسٹرڈ ہوئی۔

ہمارا مشن پاکستان کو نظریاتی و فکری محاذ پر مضبوط و مستحکم کرنا، نظامِ مصطفیٰ ﷺ کا عملی نفاذ، اور ایک ایسا اسلامی فلاحی معاشرہ تشکیل دینا ہے جس میں ہر شہری کو سماجی انصاف، انسانی حقوق، تعلیم، صحت، اور روزگار و کاروبار کے مساوی مواقع میسر ہوں۔ وطنِ عزیز کی جغرافیائی و نظریاتی سرحدات کو ناقابلِ تسخیر بنانے کے لیے ملکی سلامتی و دفاع کے ذمہ دار قومی اداروں کے ساتھ مکمل ہم آہنگی بھی ہمارے ایجنڈے کا بنیادی حصہ ہے۔